കളമശേരി: കളമശേരിയിൽ മഞ്ഞപ്പിത്തം പടരുന്നു. വിദ്യാലയങ്ങളിൽ പലയിടത്തും മഞ്ഞപ്പിത്തം ബാധിച്ച് കുട്ടികൾ അവധിയിലാണ്. നിരവധി പേർ സർക്കാർ മെഡിക്കൽ കോളജിലും, സമീപത്തെ സ്വകാര്യ ആശുപത്രികളിലുമായി ചികിത്സയിലാണ്. ഹൈപ്പറ്ററ്റീസ് എ മറ്റുള്ളവരിലേക്കും പകരുന്ന സ്ഥിതിയുണ്ട്. കഴിഞ്ഞ വർഷവും ഇതേ രീതിയിൽ മഞ്ഞപ്പിത്തം പടർന്നിരുന്നു.
ചെറിയ കടകൾ കേന്ദ്രീകരിച്ച് ആരോഗ്യ വകുപ്പ് പരിശോധന ആരംഭിച്ചു. 14 ഓളം സാമ്പിളുകൾ ടെസ്റ്റിന് അയച്ചു. സർക്കാർ അറിയിപ്പു പ്രകാരം കളമശേരിയിൽ 16 പേർ മാത്രമാണ് ലിസ്റ്റിലുള്ളത്. ഭക്ഷണത്തിലും, വെള്ളത്തിലും കൂടെ പകരുന്നവയാണ് ഹൈപ്പറ്റൈറ്റിസ് എ, ഇ വിഭാഗത്തിൽ പെടുന്നവ. എന്നാൽ രക്തത്തിലൂടെ പകരുന്ന ബി, സി വിഭാഗവും കുറവല്ല.
രോഗബാധിതരായാൽ മറ്റുള്ളവരുമായി ഇടപെടുകയോ, രോഗി ഉപയോഗിച്ച ടോയ്ലറ്റ് ഉപയോഗിക്കുകയോ, ആഹാരം പങ്കുവയ്ക്കുകയോ, രോഗിയുടെ തുണികൾ ഉപയോഗിക്കുകയോ ചെയ്യരുത്. ജനങ്ങളിൽ ബോധവത്കരണം നടത്തുന്നുണ്ടെന്ന് കളമശേരി പിഎച്ച്സിയിലെ ഡോക്ടർ പറഞ്ഞു.

