കളമശേരി: അഴിമതിയും അമിത അധികാര പ്രവണതയും കൈമുതലാക്കാക്കിയ നേതാക്കൾ കളമശേരി പൗരാവലിക്ക് വലിയ ബാധ്യതയായിക്കൊണ്ടിരിക്കുന്നതായി എൽഡിഎഫ് തെരഞ്ഞെടുപ്പ് കമ്മിറ്റി ഓഫീസിൽ വിളിച്ചു ചേർത്ത പത്രസമ്മേളനത്തിൽ നേതാക്കൾ പറഞ്ഞു. കഴിഞ്ഞ അഞ്ചുവർഷ ചരിത്രത്തിൽ ഇല്ലാത്ത വിധം എല്ലാ മേഖലയിലും കടുത്ത അഴിമതിയാണ് നടമാടിയതെന്ന് എൽഡിഎഫ് കുറ്റപ്പെടുത്തി. ഈ തെരഞ്ഞെടുപ്പിൽ ബിജെപിയുമായി ചേർന്ന് എൽഡിഎഫിനെ പരാജയപ്പെടുത്താനുള്ള തന്ത്രങ്ങളാണ് യുഡിഎഫ് ആവിഷ്കരിക്കുന്നത്.
ബിജെപിയുമായി അവിശുദ്ധബന്ധം കാത്തുസൂക്ഷിച്ചാണ് കഴിഞ്ഞ അഞ്ചുവർഷം യുഡിഎഫ് ഭരണം തള്ളിനീക്കിയത്. ഈ ഘട്ടത്തിലൊക്കെ യുഡിഎഫ് ഭരണത്തിന് ബിജെപി പിന്തുണ നൽകുന്ന അവസ്ഥയും ഉണ്ടായി.
പുരോഗതിയേക്ക് കുതിക്കുന്ന കേരളത്തിനൊപ്പം എത്താൻ കളമശേരിയിലെ ജനങ്ങൾ മാറി ചിന്തിക്കണം എന്നാണ് എൽഡിഎഫിന്റെ ആഗ്രഹമെന്ന് നേതാക്കൾ പറഞ്ഞു.
വാർത്താ സമ്മേളനത്തിൽ കെ.ബി. വർഗീസ്, സക്കീർ ഹുസൈൻ, എസ്. രമേശൻ, കെ.എം ഇസ്മായിൽ തുടങ്ങി എൽഡിഎഫ് നേതാക്കൾ പങ്കെടുത്തു.

